Sunday, October 28, 2007

مراحل

حاجات معينة احب اسيبها لكو فى البلوج قبل ما امشى و اغيب عشان الجيش
كان منها و فى الفترة -الى ربنا ما يحكم بيها على حد- بتاعة بداية التكليف و دخول الجيش
قضيت معاكو الفترة دى
و اشتركت بكم كبير جدا من المشاركات
الى كان كتير منها غريب زى ما وصفتوها بكدا
و لذلك تلاقى اغلب الناس تقول لى انا بحترم وجهة نظرك جدا بس بختلف معاها

بجد انا سمعت التعليق دا كتير جدا
مش عارف ليه؟؟
يمكن
لأنها غريبة و مختلفة و محدش متعود عليها
طيب طالما هى غريبة
بيحترمها ليه؟؟
المهم تقريبا كدا رسالتى فى الفترة دى وصلت مش عارف لسا في حاجة تانية ولا لأ؟؟

و قبل ما امشى
و استكمالاً لمسلسل الحلقات الأخيرة
الى كانت بتختم فترة و مسلسل من الردود و المناقشات و الى بستنتج منها حاجة و بحب الخصها فى حلقة اخيرة
اليكم حلقة مراحل

و الى ملخصها ان كل واحد فينا حياته كلها عبارة عن مراحل
و كل مرحلة ليها خائصها و سماتها الخاصة
و هو نفسه بيتغير من كل مرحله للتانية
بيتغير فى الشكل زى ما بيتغير فى المضمون
و بتتغير معاه افكاره و آراءه
و بتتغير صفاته
و بيتغير سلوكه

يعنى الانسان فينا هو نفسه بيتغير

و انا عاوز كل واحد كدا يفتكر من سنتين كان رأيه ايه فى موضوع ما
او كان هيتصرف ازاى فى موقف ما
او كان بيقضى يومه ازاى

و دى حاجة تخلى الواحد بجد ميتمسكش بوجهة نظرة او رأيه فى موضوع معين مهما كان هو متأكد من رأيه دا
لأنه هو نفسه ممكن بعد فترة يغيرها
و دا برده يخلى الواحد يتقبل وجهات النظر المختلفة بصدر رحب
مهما كانت
و نقبل النقاش
و نجرب نفكر فيها
و نديها فرصة تثبت نفسها
لأنها لو اثبتت نفسها يبقى كدا هو اعتنق فكرة صح و غير مفهوم و رأى و اعتقاد من اعتقاداته الى كان مؤمن بيها
يعنى هو الكسبان
و لو الفكرة او الرأى اثبت خطأه بعد ما اداله فرصته فى التفكير و التجربة يبقى كدا هو كسب برده لأنه دلوقتى

متاكد انه كان صح و على حق
و برده بعد دا كله
و بعد كل دا
ميبقاش متأكد تماما انه على حق
و يفضل عاطى لنفسه و للفكرة المختلفة او للرأى الآخر فرصه مستمرة و مستديمة فى اثبات نفسها
لأنه طول ما هو عايش بيتعرض لحاجات و مواقف ممكن فى اى لحظة توجهة الاتجاه الصح
و تثبت صحة الرأى الآخر
و دا فى رأيى هو تعريف الشخصية المتفتحة
الشخصية المتفتحة هى الى بتعمل كدا


و حاجة تانية
هى الانسان يحاول دايما يتغير للأحسن
و يستغل الظروف الى مر بيها و الى هى بالضرورة هى السبب فى تغييره لتغييرة للأحسن
حتى لو كانت ظروف مش كويسة
يستغلها و يتعلم منها

و برده ميحاولش ميبالغش فى التغير السريع بين رأيين
لان دا هيبقى اسمة تردد
و التردد هو انه يتغير من رأى للآخر بدون وعى و بدون تفكير
و برده ميتغيرش من النقيض للنقيض فجأه و بدون تفكير و وعى
لأن دا هيبقى اسمه رد فعل و مش تغيير حقيقى
و بيؤدى لحاجة من الاتنين اما الاتنكاسة
او التعصب الاعمى
يعنى المهم فى كل الاحوال هو العقل و التفكير الى ربنا سبحانه و تعالى انعم علينا بيهم
و جعلنا مخيرين لا مسيرين (بضم الميم فى الكلمتين)

و مدنجى دلوقتى على باب مرحلة جديدة
يتمنى يرجع لكو تانى و هو متغير للأحسن
و انا متأكد انى لما هرجع هقول: هو ايه الكلام الى كنت كاتبه دا ؟؟
و ايه الكلام الى كنت بكتبه دا ؟؟
و ممكن اكون غيرت وجهة نظرى تماما فى كل الى كتبته هنا
و فى الموضوع دا بالذات كمان
و دا لو حصل
هيبقى اكبر دليل على صحة كلامى فى الموضوع دا


مش عارف هيبقى فيه حلقات اخيرة تانية و لا لأ؟؟
لأنى مش عارف قولت كل الى عندى ولا لأ؟؟
و دا لأنى مقتنع ان كل واحد فينا له رسالة ربنا سبحانة و تعالى بعته بيها للناس
لازم يحاول يوصلها
هتقولو لى: مهو فى ناس كتير ملهاش لازمة ايه رسالتهم دول؟؟
اقول لكو: دول رسالتهم انهم يقولو رسالة للناس التانيين محتواها و مغزاها "شوفو ازاى في ناس ملهاش رسالة و ملهاش لازمة اوعو تبقو زيهم!! شوفو ازاى فيه ناس بتتولد زى ما بتموت و محدش بيسمع عنها!!" هى دى رسالتهم

ادعولى..

Sunday, October 7, 2007

انا المسؤول

كل الناس احرار طبعا فى آراءهم
و كل واحد حر يقول انه مبيعجبوش كلام شيخ الازهر
بس برده الحرية ليها حدود

لكن معلش اسمحولى اكون انا حر كمان فى الكلمتين الى هقولهم دول
و مش عارف انا هلزم حدودى فى الكلمتين دول ولا لأ

اولا مفيش شك اننا كلنا بنغير على ديننا
و كلامنا فى المواضيع كلها او حتى فى الموضوع دا
بيبقى من منطلق الغيرة دى

ثانيا موضوع الكلام على الامام الكبر شيخ الازهر دا قديم
و الجديد دلوقتى هو الكلام على المفتى كمان

بس فى الغالب الكلام بيبقى فى نفس الاطار
الى هو
انهم بايعين دينهم و شاريين دنيتهم
و منصاعين لاوامر و اهواء اولى الامر

و الكلام كتير برده عن اولياء الأمور
الريس
و رئيس الوزرا
و مرات الريس
و ابن الريس
و غيره و غيره





و عن ناس كتير ربنا انعم عليهم او ابتلاهم بالمناصب الى هما فيها
و دى مسؤولية كبيرة جداً
و دا خلاهم يدخلو جوا دايرة الانتقاد المفرغة
الى الشعب فيها قاعد بنتقد و يشتم فى اولياء امورة
لأسباب كتيرة

اولها و اهمها ان مفيش حد راضى بحالة
و مفيش حد بيحمد ربنا ابداً
و معدش فيه حد قنوع

ثانيها ان برده الجو العام مش كويس
يعنى الدنيا مش زى الفل
و الفساد منتشر على كافى الاصعدة
لكن فى نماذج كويسة برده
مش الفساد بس الى موجود

ثالثها ان احنا لينا اعداء خارجيين بيقعدو يبثو السموم و الخبار الكاذبة لزعزعة الاستقرار لأن هم ليهم مصلحة فى كدا

رابعها الاعداء الداخليين الى ميفرقوش عن الخارجيين فى حاجة الا انهم اشد منهم خطراً و خبثاً

خامسها حاجة مهمة جداً جداً جداً موجوده فى كل واحد فينا بس مش حاسسها بس بتتحكم فيه و بتدفعة الى تصديق الاخبار
الى من النوع بتاع الفساد و بيع الدين دا
هو ان الواحد ما بيصدق يسمع حاجة من دى
و يروح على طول يقول
شوفتو؟؟
شوفتو الفساد؟؟
شوفتو الراجل الى باع بلده؟؟
شوفتو الراجل الى باع دينه؟؟
شوفتو؟؟
و دا نوع من انواع تبرير الفشل الى كلنا حاسين بيه
و نوع من انواع تحميل المسؤوليه للغير
و التهرب من المسؤوليه


يعنى من الآخر نعمل ايه؟؟
او انا رأيى نعمل ايه؟؟

انا شايف ان احنا منمشيش ورا اى فكرة هدامة غرضها زعزهة الاستقرار و زعزعة ثقتنا فى اولياء امورنا

او منصدقش اى خبر كدا على طول من غير ما نتأكد منه

انا شايف ان لو كل واحد فينا اعتبر انه مسؤول عن كل المشاكل الى حواليه
و انه ملزم انه يصلحها
هيبقى حالنا احسن بكتير

يعنى ممكن اضرب مثال
ايام ما رسمو الكاريكاتير المسيء للرسول عليه الصلاة و السلام
طبعا الدنيا هاجت و ماجت
و قالو الكفرة الخنازير شوفو عملو ايه
و قالو فين اولياء امورنا
و قالو فين المفتى و فين شيخ الازهر
و قالو قاطعوهم
و قالو
و قالو
و قالو
و قالو
و دا طبعا زى ما قولت ليكو نوع من انواع تبرير الفشل او نوع من انواع القاء المسؤولية على الغير


انا اول حاجة قولت لازم اتأكد من الخبر
و اتأكدت منه
تانى حاجة قولت اكيد انا غلطان فى حاجة
اكيد انا الى غلطان
و انا السبب الى خلا الناس دى ترسم الرسومات دى
انا السبب
ازاى؟؟
ازاى؟؟
و فضلت ادور ازاى اكون انا السبب فى حاجة زى كدا

اه لقيت انى انا معرفتهمش الاسلام على حقيقته مثلا
و لاقيت حاجات تانية كمان مش لازم يكون ان دا السبب بس
يبقى ايه الحل

اولا انى اكون مسلم صح يعنى اعرفهم الاسلام عن طريق تصرفاتى و افعالى
ثانيا انى افهمهم و اوصل لهم يعنى ايه الاسلام

اعتقد دا هو الطريق الاصح للتعامل مع الحاجات الى من النوع دا
عمر ما الاخبار و الحاجات الى من النوع دا ما هتجيب نتيجة طول ما احنا ماشيين فى الدايرة المغلقة الى احنا عايشين فيها و خلقناها لنفسنا لتبرير فشلنا و القاء المسؤولية على الغير

مثال تانى
انا عمرى ما تضايقت من الواسطة الى موجوده فى الكلية او حته تانية غير الكلية
انا ليه مبقيتش نايب و اتعينت فى الجامعة؟؟
عشان الواسطة؟؟
عشان الامتحانات صعبة؟؟
عشان ظروف الحياة صعبة؟؟
عشان نظام التعليم الفاشل؟؟

لا طبعا
مش هرمى المسؤوليه على الغير

اكيد اكيد انا لو كنت ذاكرت برجولة اكتر و بجديه اكتر كنت هبقى الاول على الكلية
و محدش هيقدر يمنعنى
و مستحيل حد يقدر يمنعنى

بس انا الى غلطان




فى النهاية
انا شايف ان الاسلوب دا فى التفكير هو الاصح من وجهة نظرى
و شايف من وجهة نظرى ان لو كل واحد فينا فكر بالاسلوب دا الحال هيتغير كتير



يا جماعة انا بعلنها من هنا و بقول

انا غلطان و مسؤول عن كل حاجة وحشة بتحصل فى العالم

و ربنا يعينى و اعرف اصلح اخطاءى دى كلها

ممكن يكون غيرى بيغلط برده
بس برده غلط غيرى دا مسؤوليتى برده و انا السبب فيه
و عشان كدا برده انا الى غلطان

عازين تساعدونى
و لا هتفضلو مشغولين بالكلام عن شيخ الازهر و المفتى و رئيس الوزرا و تزوير الانتخابات و الرينال كوليك و المشكلة الفلسطينية و العراق و جمال مبارك و الغلاء و الفيديو كليبات و الكانسر كولون و الموسيقى و ختان الاناث و الاغانى و فوايد البنوك والثانوية العامة و المرتدين و الامريكان و الكاليزيون و كل المشاكل و المصايب الى انا مسؤول عنها
و مسؤول انى اصلحها

مشاهدات و تعليقات

اسمحولى اكتب الموضوع دا بدون نقل اى كلام بالنص من اى حتة و بدون اقتباس اى كلام بالنص
اكتبه بالاحساس او زى ما اى شيخ فى خطبة الجمعة يكون عاوز يستشهد بحديث او آيه من القرآن و ميكونش حافظها فيقول : "فيما معناه" ؟؟؟؟!!!!!!
المهم
انا عايز اقول ايه؟؟

انا هقول ليكو بعض المشاهدات و التساؤلات و التعليقات
ممكن يكونو ملهمش علاقة ببعض


مشاهدة:
-كل يوم فى الأخبار و على اى قناة تلاقى مشاهد و صور لناس ملثمين و ماسكين اسلحة و قاعدين يضربو فى

الهوا و مش عارف مسميين نفسهم جماعة اى حاجة كدا بس اسم الجماعة فية دايما كلمة الاسلام او الله او اى حاجة تدل على مرجعيتهم الدينية الاسلامية فاليومين دول مثلا الموضوع واضح جداً بالذات بعد الى بيحصل بين حماس و فتح و الموضوع دا برده واضح برده فى العراق

-سؤال:
عيل اجنبى من امريكا او اوروبا او حتى واحد كبير ميعرفش فى حياته غير الشغل و جمع الفلوس و العيش فى امان.. هيقول ايه لما يشوف المناظر دى؟؟
صورة المسلمين الى هتنطبع فى خياله هتبقى عاملة ازاى؟؟

-تعليق:
انا قولتها قبل كدا
مش الدنماركيين هما الى رسمو الصور المسيئة للرسول عليه الصلاة و السلام
احنا الى رسمناها بس بأيدى الدنماركيين

مشاهدة:
علم السعودية الشهادة و تحتها سيفين
شعار الاخوان مش عارف باين سيفين و لا حتى بندقيتين و بينهم المصحف
شعار حماس بنادق و مش عارف تقريبا واحد ملثم

سؤال:
عيل اجنبى من امريكا او اوروبا او حتى واحد كبير ميعرفش فى حياته غير الشغل و جمع الفلوس و العيش فى امان.. هيقول ايه لما يشوف المناظر دى؟؟
صورة المسلمين الى هتنطبع فى خياله هتبقى عاملة ازاى؟؟

-تعليق:
انا قولتها قبل كدا
مش الدنماركيين هما الى رسمو الصور المسيئة للرسول عليه الصلاة و السلام
احنا الى رسمناها بس بأيدى الدنماركيين

-مشاهدة:
عملية انتحارية -انا بسميها كدا- يقوم بيها احد الفلسطينيين بتفجير نفسه داخل محل للطعام بأسرائيل.
واحد من جماعة مش عارف ايه كدا الاسلام اختطف طيارة و بيهدد بقتل الى فيها.

-سؤال:
عندما كان المسلمين مستضعفين و قلة بمكة
هل فكر جماعة منهم فى الاغارة و التسلل ليلا لقتل ابو جهل مثلاً؟؟
هل فكر جماعة منهم فى الاغارة و التسلل ليلا لخطف اولاد احد الكفار و التهديد بقتلهم؟؟
هل فكر جماعة منهم فى الاغارة و التسلل ليلا لتحطيم صنم حتى؟؟
هل امرهم الرسول عليه اصلاة و السلام بذلك يوماً؟؟
كيف كانت المواجهات بين المسلمين و الكفار؟؟
اكانت حرب عصابات؟؟
ام كانت حروب منظمة يحترم فيها المسلمون اعراف الحرب فى ذلك العصر و يحترمون دينهم فيها؟؟
هل روعو يوما صغير او امرأة او شيخ؟؟


-سؤال تانى:
لما بتسمع خبر عن عملية انتحارية او عن قتل اسرائيلى او عن خطفه..
بتفرح ولا بتزعل؟؟
ليه؟؟

-لا تعليق.....

مشاهدة و سؤال:
كام واحد يهودى او حتى كمان اسرائيلى اخد جيزة نوبل؟؟
و كام واحد مسلم او حتى عربى اخد جايزة نوبل؟؟
بلاش جايزة نوبل لأن فيه ناس هتشكك فيها
شوفو حال العلم عندنا عامل ازاى و عندهم عامل ازاى؟؟
احكمو انتو؟؟؟

سؤال:
عيل اجنبى من امريكا او اوروبا او حتى واحد كبير ميعرفش فى حياته غير الشغل و جمع الفلوس و العيش فى

امان.. هيقول علينا و عليهم ايه؟؟
صورة المسلمين الى هتنطبع فى خيالى هتبقى عاملة ازاى؟؟
متخلفين
صح؟؟؟؟

-لا تعليق.....

-مشاهدة:
لم اصادف يوماً فى الاحاديث التى اقرأها او اسمعها فى صلاة الجمعة او فى اذاعة القرآن الكريم هذا الموقف
ان احد الصحابة رأى احدى النساء فقال لها انتى مين؟
فردت عليه و قالت انا فلانه؟
هو طبعا سأل السؤال دا عشان هيا منتقبة و هو مش شايف وشها
اعتقد السيرة مليانة مواقف بين الصحابة و النساء
و الرسول عليه الصلاة و السلام و النساء
مفيش مرة سمعت عن الموقف دا

-سؤال:
هل لأن النساء اياميها كانت بتكتب اسمها على النقاب؟؟
هل لأن كل واحدة مثلاً كان ليها لبس بلون معين كانو بيعرفوها بيه؟؟
و لا الى نقلو لنا السيرة كانو بيحذفو الجملة دى من الحوار؟؟


-مشاهدة:
فى الخطب و الجوامع دايما لما ييجى الامام يدعى فى الآخر يدعى على اليهود و الكفار و الامريكان
و يدعى ان يدمرهم الله و يبتليهم بالمصائب من عنده و بالزلازل و البراكين والكوارث.

-سؤال:
كم مرة دعا الرسول عليه الصلاة و السلام على الكفار؟؟
و كم مرة دعا لهم بالهداية؟؟
السيرة عندكو دورو و ابحثو فيها

شوية اسئلة:
-ليه دايما اكتر دولة عربية موجود عنها اخبار فى شريط اخبار الجزيرة بتكون مصر و كل الاخبار بتكون سلبية؟؟

-ليه دايما تلات اربع الخبار فى شريط الاخبار فى القنوات المصرية عن الريس عمل.. الريس ترك.. الريس كلم

فلان.. الريس استقبل علان؟؟

-ليه دايما بنقول على اليهود قردة و خنازير؟؟
هل هما كدا فعلا؟؟
هل عندما مسخ الله فئة ضالة منهم لقردة و خنازير كان الباقى منهم برده يستحق المسخ؟؟
هل كلهم كدا؟؟
ارجو التحقق من القصة........
هل فى يوم من الايام الرسول عليه الصلاة و السلام او احد الصحابة وصفهم بالوصف دا
هل قاطع الرسول عليه الصلاة و السلام اليهود و قطع كل تعاملاته مع اليهود حتى بعد طردهم من المدينة؟؟
هل الوصف دا الى احنا بنوصفهم بيه و الدعاء الى بندعيه عليهم جهل؟؟
و لا دعاء العاجز؟؟

-هل تخيلتم فى يوم ان احد الصحابة او الصالحين صعد على المنبر و قعد يصيح و يزعق و يشخط و ينطر و يقول
انت مبتصليش ليـــــــــــــــــــــــــه؟؟
عــــــــــــــــــــــــــــــه؟؟
خايف عل جزمة؟؟
عــــــــــــــــــــــــــــــه؟؟
....................................
هل كان هذا اسلوب الرسول فى الدعوة
هل انتشر الاسلام بالشخط و النطر؟؟
هل فرضت الصلاة بالشخط و النطر؟؟

-هل هتبقى مبسوط لو اسرائيل اعلنت ان القدس هى عاصمة فلسطين
و انت دلوقتى تقدر تزور المسجد الاقصى
بس بشرط انك تتعامل مع اسرائيل عادى جدا و تقبل بيها دولة فى المنطقة؟؟
بصراحة؟؟
هتبقى مبسوط؟؟
و لا هتنبسط اكتر لو الفلسطينيين قامو قتلو الاسرائيليين و مصر قامت حاربت و الاردن كمان و سوريا و كل الدول

و محينا اسرائيل دى من على وجة الارض..
هتنبسط اكتر امتى؟؟
و ليه؟؟

كفاية كدا دلوقتى
اكمل بعدين..