سمكة و صنارة

قصة قديمة كلنا عارفينها
واحد جوعان راح لعمدة قرية ساحلية تعمل بالصيد يطلب منه اكل
فالعمدة ادالة صنارة
طبعا الجوعان معرفش هيعمل ايه بالصنارة
هيطبخها ازاى؟؟
دى حاجة متشبعش
طبعا كان نفسة العمدة يدى له سمكة و خلاص علشان ينجز
لكن للأسف العمدة طلبت معاه يتعب الجوعان
و كان غرضة طبعا زى ما احنا كلنا مدركين انه يعلم الجوعان دا ازاى يصطاد
اهو منه يضمن انه يبقى شبعان على طول و منها انه يريح دماغة منه بعد كدا و ميجيش يطلب منه اكل تانى
و فى يوم من ذات الايام
خيرو اهل البلد انهم يختارة العمدة بتاعهم بنفسهم
فيه عمدة تروح له تطلب منه طلب يديك سمكة
و فيه عمدة يديك الصنارة
و بقى فى انصار لعمدة الصنارة و انصار لعمدة السمكة
و للأسف انصار عمدة السمكة اكتر
فبيحصل تصادم
بين اغلبية السمكة و اقلية الصنارة
راحت الحكومة معينة عمدة يمسك الكفر بأيد من حديد و يبقى معاه السمكة و الصنارة
و يلم حوالية كل من معاه سمكة او صنارة
و يكسر صنارة اى حد تانى ميتعاونش معاه و يبقى فى صفة
و ياخد السمكة من اى حد مش معاه
بس الغريب ان القرية عايشة فى استقرار
على عكس قرية تانية بعيد
الدنيا اتقلبت فيها و البلد اتكسرت عشان اغلبية اهل البلد اختارو عمدة السمكة و الباقى من انصار عمدة الصنارة هاجو و ماجو
رأيكو اهل القرية يعملو ايه؟؟
الخيار صعب
نمشى مع الأغلبية من انصار عمدة السمكة
و لا يمشو عكس التيار مع انصار عمدة الصنارة
و كل دا ضد العمدة اللى معاه السمكة الصنارة
و لا يمشو مع عمدة السمكة الصنارة و يبقى من رجالتة و انصارة
مهو شغال كدا و كدا بيدى سمك و يبدى صنانير و كمان انصارة بينولهم من الحب جانب كبير قوى






دى..

تويتر و الفيسبوك و مصر و ايران

ايه العلاقات اللى ممكن تربط الكلام دا ببعضه؟؟

تويرتر و فيس بوك موقعين على الانترنت
مصر و ايران دولتين على الكرة الارضية


طيب فيه علاقات تانية
ايران و الاحداث الجارية الاخيرة و مشاكلها اللى حصلت قبل و فى و بعد الانتخابات كان لها علاقة وثيقة جدا بتويتر و الفيس بوك
ازاى
تعالو نحلل الموقف اكتر

احمدى نجاد بيلعب على وترين
الوتر الاول وتر الفقراء و توزيع فلوس الشعب على الشعب
يعنى حاجة كدا زى لو جا علينا واحد يرشح نفسه فى الرئاسة و قال انه هيوزع ايراد قناه السويس و البترول و الغاز على الشعب
الوتر التانى وتر الحماسة و الشجعنة و معاداه امريكا و اسرائيل و الجرأه فى الخطاب و اتخاذ المواقف بالذات المرتبطة بالمشروع النووى الايرانى و دى من الحاجت اللى بتلهب الحماسة فى الشعوب و بتحسسهم بالقوة
دول هما النقطتين اللى بيلعب عليهم احمدى نجاد
و الل بتجعل له شعبيه طاغية بين عامة الشعب فى ايران

موسوى و اتباعه
من انصار العلم و التكنولوجيا و الانترنت
عاملين غاغة على الفيس بوك و التويتر
لدرجة جعلت حكومة ايران تحجب احد الموقعين او الاتنين لفترة من الفترات
و دول بياخدو الوجهة العقلانية شوية و بيقولو تصرفات احمدى نجاد ممكن تؤدى لكارثة فى انه بيوزع الفلوس كدا بدون استخدامها
يعنى بيدى للناس السمك مش بيعلمهم الصيد
دا غير اسلوبه فى الحوار مع الغرب

و دا اللى ادى لحدوث الاصطدام بين الفريقين

ماشى
ايه دخل مصر فى الموضوع؟؟
تقريبا الشعب عندنا منقسم لنفس القسمين دول

القسم الاول هو القسم الغلبان
و هو القسم الاكبر
و هو اللى عاوز يعيش و ياكل و يشرب و ينام و يتمتع بأيراد قناة السويس و البترول و الغاز
و القسم التانى اللى بدأ يظهر بقوة هو قسم انصار الفيس بوك و تويتر و الناشطين السياسيين
و هو ممكن يكون القسم الاقل عددا
بالرغم انه ممكن يكون القسم الاصح فى وجهة النظر

مرشح رياسة او حتى مجلس شعب غنى بيوعد الناس بالوظايف و بالعلاج على نفق الدولة و بأنشاء مستشفى و جامع و كمان بيوزع عليهم فلوس
و لا مرشح رياسة او حتى مجلس شعب متعلم بيوعد الناس بتغييرات اقتصادية و سياسية و تغييرات فى السياسة الصحية و الاقتصادية فى البلد


و دا بوضعنا اما معضلة كبيرة
مين الصح؟؟
مين الاكتر؟؟

هل الديموقراطية اللى مبتعترفش الا بالارقام صح اصلا؟؟
يعنى لو 10 متفقين على حاجة و واحد معارضهم
هل بالضرورة الواحد دا غلط و ال10 دول صح

الى حد ما سؤال صعب
بس الحل بيكم فى ان لو الواحد دا صح و مقدرش يقنع ال10 اللى حوالية و يفهمهم و يوعيهم بوجهة نظرة و يكسب منهم على الاقل 5 معاه عشان يكسب الاغلبية بيبقى هو الغلط بالرغم انه ممكن يكون هو الصح

دى دعوة لكل المثقفين او كل اللى بيقولو على نفسهم نشطاء و انصار الفيسبوك و التويتر لتوعية الانسان البسيط و تفهيمه بكل صدق للى بيحصل
قبل ما الفاس تقع فى الراس
و تبقى فيه علاقة بين ايران و نصر و الفيس بوك و التويتر اكتر من كدا
و قبل ما الصدام يتنقل للشوارع










دى..

عن السلفيين

مدنجى رقم 1	مدنجى رقم 2
· واحد عادى خالص	· واحد مربى لحيته
· اخلاقه كويسة بيعامل الناس كل الناس كويس	· اخلاقه كويسة بيعامل الناس كل الناس كويس · بس بيحب اكتر الى مربى لحيته و هما شلّته و اصحابه المقربين
· مسلم	· مسلم
	· سلفى
· بيصلى كل الصلوات- بما فيهم الفجر- فى المسجد	· بيصلى كل الصلوات- بما فيهم الفجر- فى المسجد · بس بعد كل صلاة بيحب دايما يفيد زملاءه و اخوانه بدرس دينى فيه النصيحة · و فى الغالب الدرس دا بيكون عن اطلاق اللحية و حف الشارب او عن خطأ الاسراف فى الزينة بالمساجد او على البدع التى انتشرت هذه الايام و ليس لها مرجعية فى الدين و عند السلف الصالح او عن دعاء القنوط و شروطه · بس ساعات بيتكلم عن فضل صلاة الفجر و فضل الصلاة بالمسجد · بس عمره ما اتكلم فى السياسة هو ممكن يلمح من بعيد بس
· مجتهد فى شغله و مذاكرته · هو آه ساعات بيضيع وقته فى قراءة كتيبات زى كتيبات احمد خالد توفيق و نبيل فاروق او اى حتى روايات · بس الحمد لله مبسوط من نفسه و بيعدى مستريح فى الامتحانات	· مجتهد جدا فى قراءة الكتب الدينية و بالذات الكتيبات الصغيرة و سماع شرائط الخطب الدينية لمحمد حسان و محمد حسين يعقوب · بس برده بيذاكر بس للأسف بيعدى الامتحانات بالعافية · بس اصحابه الى زيية فيهم برده ناس شاطرة · بس برده هو مبسوط من نفسة لأنه أخد العلم الى هينفعه فى دنيته و آخرته
· بيحب اذاعة القرآن الكريم · بس ساعات بيسمع على نجوم اف ام	· بيحب اذاعة القرآن الكريم. · هو بس بيحب المنشاوى اكتر واحد
· و بيحب شيوخ الازهر و الشعراوى و القرضاوى و عمرو خالد و كل من حس انه بيحب الاسلام · بس مبحبش محمد حسان و محمد حسين يعقوب و بيقول دول بينفروا الناس و بينفروه من الدين و بيحبكوها قوى	· مبيحبش شيوخ الازهر او مش كلهم · و الشعراوى له عليه انتقادات و بيقول عليه دا صوفى. ازاى تسمع كلام واحد صوفى؟؟ · و القرضاوى و عمرو خالد دول اخوان و مش دارسين كويس؟؟ · و الشيخ محمد الغزالى! مين الشيخ محمد الغزالى ؟؟ دا شيخ؟؟ اوعى تقول عليه شيخ ؟؟ · و كل كلامه و مرجعيتة لابن تيمية و ابن القيم و العلامة ابن عثيمين و واحد تانى مش فاكر اسمه! · و كل ما تيجى سيرة الشيخ طنطاوى شيخ الازهر يبتسم ابتسامة الله اعلم بمغزاها
· بيحب بلده و بيحترم اولياء اموره · بيتكلم فى السياسة معرض او مؤيد · بس برده ماشى جنب الحيط او حتى بعيد عن الحيط عشان الحيطان ليها ودان	· بيحب دينه و مستعد يضحى عشانه · بس عمره ما اتكلم عن الوطنية و زى ما قولت ليكو عمره ما اتكلم فى السياسة · و كل ما تيجى سيرة السياسة يبتسم نفس الابتسامة الى بيبتسمها لما يسمع سيرة شيخ الازهر
· اصدقاءه: اى حد بس اكيد له شلة برده	· اصدقاءه: كلهم ملتحيين · بس برده يعرف الناس التانية و بيعاملهم كويس. لعل الله ان يهديهم و يطلقو اللحية.
· بيصلى الجمعة فى اى جامع بس فى الغالب فى جامع المدينة (اقرب جامع)	· يوم الجمعة يوم خاص يستعد فيه هو و كل الاخوة للذهاب لمسجد بعيد مش عارف فين و طبعا بيرجعو يومها متأخر بعد الخطبة الطويلة محملين بالكتيبات الصغيرة و السواك و المسك · و طبعاً بتكون الجمعة عيد لما يقنعوا حد من الناس التانيين الى مش ملتحين انه يروح معاهم و بيحتفو بيه ايما احتفاء دا حتى كمان بيظبطوه فى شوية كتيبات دا علاوه عن السواك طبعا
· بيغسل اسنانه بالفرشاه و المعجون · بس برده عنده سواك بس حاططه فى درج المكتب و ساعات يقعد يقرقض فيه و هو بيذاكر	· دايما حاطط السواك فى جيبة و بيستخدمه قبل كل صلاة و بالذات بعد الاقامة و قبل تكبيرة الاحرام · بس برده ساعات بيستخدم الفرشاة و المعجون
· ان دخل على موقع منتدى كلية طب القصر العينى يشارك فى اى مواضيع	· ان دخل على موقع منتدى كلية طب القصر العينى يشارك فى مواضيع مضمونها و عنوانها : كيف تكون سلفيا؟ · برده ساعات بيشارك فى المواضيع التانية

دى مقارنة بسيطة من واقع مشاهداتى المدنجية فى المدينة الجامعية انا فكرت كتير قيل ما اكتب الرد دا لأنى قررت انى متكلمش فى مواضيع السلفيين و الاخوان و السياسة و اتفرغ لشغلى يعنى اترك الكلام و اتجه للعمل لأن الكلام فى الغالب بيتحول لجدال و لشد و جذب و تقطيع و لأننا احنا فى اشد الحاجة للعمل لأن هو دا الى فيه الفايدة و الكلام زى ما قولت مبيجيبش غير وجع الدماغ بس انا قولت انقل ليكو مشاهدات من ارض الواقع بدون التعليق عليها و حاولت انى اكون امين و محايد

اعلق بقا على المشاهدات دى و عن ملحوظاتى و رأيى فى الموضوع دا

الملحوظة الاولى
كلام السلفيين كتير جدا جدا يعنى انا كنت زمان بتابع موضوع مناظرة بين واحد سلفى و واحد اخوان على منتديات كل الطلبة بتاعة التيار الاسلامى كان كل واحد فيهم بيرد على التانى بموضوع 200 سطر على الاقل و كلها كلام منقول طبعا انا مش عاوز اقول انهم كانو قربو يكفّروا بعض لولا تدخلات المديرين فى المنتدى بالخذف و التعديل مش قولت ليكو الكلام مبيجيبش غير وجع الدماغ
ملحوظة تانية
و مهمة جداً انتو مش ملاحظين حاجة؟؟؟
انتو مش ملاحظين ان احنا بنقول سلفيين و اخوان و... و..
مش عارف احنا ايه و مش عايز اعرف و لا عايز اتصنّف لأنى الحمد لله مسلم و عايز ابقى مسلم بس.
آه طبعاً احترم السلف و اقتدى بأعمالهم و ممكن طبعا اطلق لحيتى حباً فى الرسول عليه الصلاة و السلام و اقتداءً بالسلف الصالح لكن مش عشان ابقى سلفى عادى انا حر مربى دقنى عشان ابقى زى الرسول عليه الصلاة و السلام.
الى بيحب واحد بيحب يعمل زيه فى كل تصرفاته و حتى فى شكله كمان بس العبرة طبعا فى الجوهر. انا اذكر واحد صاحبى كان مربى سوالفه و مكبرها كدا و شكلة عجيب فسألته انت ليه عامل فى نفسك كدا انت عايز تبقى "سوالفى" و لا ايه؟؟
قالى حتى انت كمان بتقوللى كدا دا امبارح واحد من اخواننا "السلفيين"
قالى: انت عامل فى نفسك كدا ليه؟؟
انت بتقلد الكفار ليه؟؟
و من ساعتها و انا متضايق جداً.
انا ؟؟
انا بقلد الكفار؟؟
انا مش عارف فيه ايه انا بحب استاذى و عايز ابقى زيه فى كل حاجة.
بس و الله انا لقيت نفسى كدا و سوالفى كبيرة كدا فجأة و كمان دى بتوفر لى فى مكن الحلاقة (اصله كان دمياطى).
قولت له: يعنى انت بتربيتك لسوالفك هتبقى زى استاذك ؟ لأ طبعاً

شوية سمات و صفات تانية للسلفيين و منها
3- التركيز على الاستثناءات
يعنى حاجة كدا زى "ولا تقربوا الصلاة...." من غير "و انتم سكارى" و كان واضح برده ايام ما كنت فى المدينة و كنت بقعد اسمع منهم الدروس الى كانو بيقولوها بعد كل صلاة و الاحاديث الى بيحبو يشرحوها و بيتكلمو عنها
كانو بيحبو قوى حديث الذبابة و ما له من مدلول بوجوب عدم استخدام العقل.
و كتير و كتير من احاديثهم و افكرهم مبنيه على الاستثناءات و التى تتحول الى عقيده كمان و غير قابلة للنقاش و غير قابلة لأى فهم بطريقة تانية او اسلوب تانى
4- مدنجى بقى سلفى
يعنى مثلاً فيه ناس تقولك عمرو خالد اخوان الشيخ ابن عثيمين سلفى الشيخ الشعراوى صوفى حسن البنا اخوان مدنجى بقى سلفى (ملحوظة الاسامى دى ما هى الا امثلة فقط و النماذج الموجودة فى الواقع كتير جدا)
و كلام كتير ناس من الجماعات المختلفة بيقعدو يقولوه على الناس المشهورة (زى مدنجى مثلاً) و بيدعو انهم من جماعتهم و دا لما بيكونو بيحبوهم و بيعتنقو افكارهم او يدعو انهم من جماعة تانية و دا لو كانو مخالفين لهم فى الافكار
انا عن نفسى شايف ان و لا واحد من الناس الى ذكرتها دى -و غيرهم- كان يحب ينتمى الى اى جماعة من الجماعات الى نسبوهم ليها دى و لا كان يحب ينتمى لأى جماعة مختلفة او ليها سمات تميزها عن جماعة المسلمين اصلاً
كل دول فى رأيى (ما عدا مدنجى) كانو ناس محترمين اصحاب فكر و هدفهم كان الاصلاح مش تكوين جماعات فلو سمحتو خلونا نستفيد من افكار الناس دى و من منهجهم فى الحياة بدون الاخذ فى الاعتبار انتمائهم لأى جماعة او طائفة او فئة و خلونا نفوت على اى جماعة او طائفة او فئة -تدعى انتماء اى حد من الناس المحترمة دى ليها- الفرصة اننا منستفيدش بفكرهم و نفوت بردة الفرصة عليهم اننا ننتمى لجماعتهم او طائفتهم بسبب اننا بنحب حد من الناس دى


و من سمات السلفيين و اعتقاداتهم التى تصل الى حد العقيدة و الثوابت الغير قابلة للنقاش
5- انا سلفى انتمى للسلفيين و انكر على غيرى عدم انتماءه لما يسمى بالسلفيين و ابدأ معه الحوار بالنصيحة له بأن يكون سلفياً
6- انا ملتحى و انكر على غيرى انه غير ملتحى و ابدأ معه الحوار بالنصيحة له بأن يكون ملتحى
7- المرأة منتقبة و لايجوز لها غير ذلك و انكر على المرأة و لو كانت محجبة عدم لبسها للنقاب و اتكلم عن وجوب النقاب فى اول كلامى و نصيحتى للناس
8- انا مقصر لثيابى و البس الجلباب فى اغلب الاوقات و انصح الناس بفعل ذلك
9- شيوخى الشيوخ السلفيين هم فقط المصدر الرئيسى و الاهم لكل افكارى و معتقداتى و احترامى ليهم يصل لدرجة التقديس و هم فى الغالب من الامة السعوديين المحترمين طبعاً لكن للأسف منهم ناس تانية مصريين لهم افكار غريبة و عجيبة.
لكن المصريين بتوع الازهر دول مبجيبش سيرتهم ولا عمرى استشهد بأى كلام عنهم و لا حتى حتى اجيب سيرتهم بالخير و لا كمان بالشر كأنهم مش موجودين
10- وجوب النقل عن العقل و حديث الذبابة و غيره من غريب الاحاديث
11- اركز على كل ما هو فرعى و اقول دا بدعة و كل بدعة ضلاله و كل ضلالة فى النار الناس لما تقول لبعض "تقبل الله" بعد الانتهاء من الصلاة بدعة و الى يمدلى ايده بعد الصلاة يقولى "تقبل الله" مردش عليه و اسيب ايده طايرة فى الهوا و قفاه يأمر عيش لأنه بيعمل بدعة مش مهم بعد كدا هيبقى وجهة نظره فيا ايه
12-مستحيل حد مش ملتحى يأم الناس فى الصلاة و لو حصلت يبقى دى من اول علامات الفتنة بالمدينة لازم الى يأم الناس فى الصلاة يكون ملتحى بصرف النظر عن ان صوته واطى صوته وحش فيه واحد تانى حليق (هما بيقولو كدا على الى حالق دقنه) صوته احسن منه موجود مينفعش هو كدا

هؤلاء هم السلفيين الى انا عرفتهم و ما ذكرته عنهم دا بجد يعتبر من الثوابت الغير قابله للنقاش انا منكرش انهم نفسهم منهم ناس كتير اصحابى -مش اصدقائى- و علاقتى كويسة بيهم لكن اول ما بيتكلمو فى الدين و الافكار السلفية بتاعتهم دى اقولهم معلش انا آسف متتكلمش قدامى فى الدين او حتى كمان اسيبهم و تمشى و بالاضافة لكدا فيه ناس ملتحين و حافين شاربهم و مقصرين بناطيلهم كمان و اصدقائى جداً و بخرج معاهم و بهزر معاهم و بتكلم معاهم فى الدين و السياسة و كل حاجة و دا لأنهم عمرهم ماقالولى ربنا يهديك يا ابنى و تربى دقنك كدا و تبقى سلفى زينا..
و دول عمرى ما انكر عليهم انهم ملتحين و لا مقصرين هدومهم على غير شكل و هيئة جماعة الناس العاديين الى ماشيين فى الشارع لأنهم عملو كدا لأنهم بيحبو الرسول عليه الصلاة و السلام و عاوزين يبقو زيه و على سبيل ان دى من الفطرة و الناس التانية برده الى ماشية فى الشارع ممكن ماشية مع التيار و مبتربيش دقنها لأنها فاهمة و عارفة ان الرسول عليه الصلاة و السلام امر الناس بكدا على سبيل عدم مخالفة الجماعة و التشبه بالكفار فراحو نقلو اسلوب الرسول و فهمو الاحاديث كدا و مربوش دقنهم مع الجماعة يعنى ناس نقلت فعل و ناس نقلت اسلوب و كل واحد على حسب نيته و محدش انكر على التانى الى عمله و بالذات و ان المسألة دى فرعية و عيب قوى نختلف عليها و عيب اكتر الواحد يهتم بيها و يقولها اول حاجة و يضعها موضع العقيدة

موضوع الديموقراطية

انا عامةً ليا رأى فى موضوع الانظمة الحاكمة دا و يمكن قولته وقت ما كانو بيعدلو الدستور انا رأيى ان العيب اساسا مش فى اى نظام العيب دايما بيبقى فى الى بيطبقوه
سواء كانو اولياء امور او رعية
يعنى العيب مش فى النظام العيب فى التطبيق
يعنى لو طبقنا الديموقراطية و كل فرد فينا بيراعى ربه و دينه فى رأيه هتنجح الديموقراطية
و لو طبقنا الاشتراكية كنظام وكل واحد راعى ربه و دينه فى حياته يبقى هتنجح الاشتراكية
لو طبقنا اى نظام ..اى نظام و كل واحد راعى ربه و دينه و ضميره هينجح النظام دا
عشان كدا لما قالو هنعدل الدستور قولت و مالو ميعدلو المهم الى يطبق

معلش جربو كدا فكرو فى اى نظام تخترعوه بس هنطبقه صح على حسب ما هيمليه علينا ضميرنا و ديننا و شوفو النتيجة هتبقى ايه
انا شايف ان موضوع الحكم فى الزمن دا دخل تحت بند الموضوعات الى بقا ليها علم كبير ميتكلمش فيه الا المختصين الدارسين يعنى الموضوع اصبح علم كبير زى علم الاقتصاد و السياسة و غيره
يعنى مثلا عندنا فى الطب واحدة عندها التهاب حاد بالمرارة
افتحها؟؟
و لا اسيبها؟؟
دول اسلوبين ناس تقول لك افتحها و ناس تقولك سيبها و كل واحد له وجه نظر و رأى و بالرغم ان الاتنين مختلفين تماما
مدرستين مختلفتين يعنى
او نظامين مختلفين
لكن الاتنين صح
المهم كل واحد هيتعامل مع العيانة بعد كدا ازاى و كان غرضه ايه من قراره و الى هو عمله دا طبعا لو حد من عامة الناس سمع اختلاف المدرستين دول هيجزم ان واحده فيهم صح و التانية غلط
انا كان دايما من رأيى ان الاسلام دين لكل زمان و مكان المهم الى يطبقه صح و لو مكانش الاسلام كدا ,مكانش يبقى دين من عند الله

الجماعات و الاخوةو الاخوان

انا ليا وجهة نظر فى حكاية تكوين الجماعات و الفرق و الطرق و الحاجات دى و الى بشبهها لنفسى تشبيه كدا ممكن يكون قريب لينا بم ان احنا دكاترة
انا بشبه اى حد عايز يكون جماعة ذات اسم و فكر و اسلوب او شكل مختلف عن عامة الناس الى حواليه و بيعوز ان افكاره و اشكاله و اساليبه و اسمه دا ينتشر و يكتر كالخلية الورمية (بلاش اقول السرطانية)
مع نفسها كدا بتختار لنفسها شكل مختلف و بتختار لنفسها اسلوب مختلف و فكر مختلف و بتحب قوى تنقسم
و تاخد الغذاء من الخلايا الى جنبها او حتى كمان تحبها تتحول و تبقى زيها و الموضوع دا له درجات زى درجات الاورام تمام ففيه مثلاً
benign tumour
و فيه
locally malignant tumour
و فيه
malignant tumour
و فيه منهم الى بيحب يبعت كمان
metastasis
و فيه منهم الــ
stem cell tumour
الى بتحب تكون خلايا شبه الخلايا الجنينية القديمة للجسم و بتاخد اشكالها و نفس اسلوبها بصرف النظر هى دلوقتى بقت فين و ظروفها ايه..!!
و مش هكلمكو اكتر عن اساليب الاورام و طرق علاجعها و الذى منه و دا لأنى عارف انكو عارفين الموضوع دا اكتر منى و كمان لأنى شايف ان ينطبق بشكل او بآخر على حالنا دلوقتى و حال المسلمين الى كل شوية تلاقى جماعة طالعة مش عارف مسميا نفسها ايه و طريقتها و اسلوبها مش عارف ايه و ربنا يستر علينا و على حالنا و على حال المسلمين و ميوصلش الحال بينا لأن مينفعش معانا الا الــ
palliative treatment
الى للأسف انا شايف اننا قربنا ندخل على المرحلة دى لكن زى ما بيقولو ان الشافى هو الله و لازم يكون عندنا امل ان شاء الله انا هسيبكو تفكرو شوية فى التشبيه دا و تطبقوه على واقعنا الحالى يعنى تشوفو انواع الاورام الى احنا مصابين بيها ايه و خصائصها و الذى منه و تطبقو كمان طرق العلاج بأنواعها العلاج الاشعاعى و العلاج الكيماوى و العلاج الجينى و حتى كمان الاستئصال و الجراحة و العلاج بتاع انك تسيب الورم لواحده و تقول للعيان روح خلاص مفيش امل روح عيش اليومين دول قبل ما تودع


انا شايف ان السلفيين مثلا وضعو انفسهم موضع انهم يتوصفو على انهم جماعة من المسلمين مش المسلمين يعنى الواحد منهم لما ييجى يتكلم يتكلم على انه سلفى من الاول كدا بيقولك انا سلفى و دى بيبقى ليها اصداء داخل العقل الباطن للواحد سلفى؟؟
مممم جماعة من المسلمين زى الاخوان يعنى؟؟
اه... لا...لا.. بس بدقون و ملهمش فى السياسة زى الاخوان
مرة تانيه وضعو انفسهم موضع انهم جماعة من المسلمين مش من جماعة المسلمين و دا فرق جوهرى جداً و دا بيضع نواياهم موضع ريبة و شك طبعا ممكن يكون النصح و الكلام من باب الامر بالمعروف و النهى عن المنكر لكن للاسف الى بيظهر انه بيبقى هدف النصح و الحوار هو حاجة من الحاجات دى
1- اضافة شخص جديد للسلفيين على اساس ان الواحد لما بيحس انه يتبع لأقلية او لجماعة معينة بيحب دايما يجمع الناس حواليه و يقنعهم يبقو زيه عشان ميحسش بالوحدة و الوحشة و الخوف او ميحسش انه غلط فهو دايما بيسأل نفسه طالما انا صح الناس دى مش مقتنعة بكلامى ليه؟؟
و مبتبقاش زيى ليه؟؟
هم مبيربوش دقنهم ليه؟؟
الناس دى غريبة قوى..!!
2- اثبات صحة طريقته و منهجه فى الحياة و دا للأسباب الى فاتت
3- اثبات خطأ الغير و دا للأسباب الى فاتت برده طبعا دا الى ظاهر و نحسب نواياهم عند الله خير ان شاء الله

بعتذر للأخوة الغير اطباء لذكر مصطلحات طبية شوية
لكن اعتقد ان الكلام مفهوم شوية و للى عاوز تفاصيل اكتر ممكن يدعبس عن معانى الكلمات الانجليزى المكتوبة فى الويكيبيديا

الردع الدينى..!!؟؟

مش عارف انا سميتها كدا ليه بس دا الى انا بحسه
انا هعرض عليكو شوية امثلة لتوضيح ما هيه هذه الظاهرة

المثال الاول
ان يسمى جماعة من الناس انفسهم حزب الله
بصرف النظر عن توجهاتهم و افعالهم فأنت اول ما تسمع الاسم على طول ما تقدرش تتكلم و لا تعلق عليهم و لا تغلط فيهم
ليه؟؟
لأن حزب الله هم الغالبون
صح و لا ايه؟؟

المثال التانى
فروع المعاملات الاسلامية بالبنوك
برده بصرف النظر عن توجهاتهم و افعالهم فأنت اول ما تسمع الاسم على طول ما تقدرش تتكلم و لا تعلق عليهم و لا تغلط فيهم
ليه؟؟
لأن دا فرع المعاملات الاسلامية!!
الاسلاميــــــــة!!..ها!!؟؟..
ايه؟؟
فى حاجة؟؟..!

المثال الثالث
ما يقولون عليه انه راجل مبروك و بيعالج بالقرآن
برده بصرف النظر عن توجهاته و افعاله فأنت اول ما تسمع الاسم على طول ما تقدرش تتكلم و لا تعلق عليه و لا تغلط فيه
ليه؟؟
لأنه بيعالج بالقرآن!! القرآآآآآن!! ..ها..
ايه؟؟
فى حاجة؟؟..!
تقدر تتكلم..!!؟؟

المثال الرابع
الحجامة و الطب النبوى
بصرف النظر عن انها مفيدة او غير مفيدة لها اعراض جانبيه و للا ملهاش تنفع لناس و ناس لا و لا عادى اى حد يعملها
بدون تفكير لازم تقتنع بيها و متقدرش تتكلم و لا تعلق عليها
ليه؟؟
دى سنة؟؟
و مؤكدة
تقدر تتكلم..؟؟!!
دا فيه شفاء للناس..
صح و لا ايه؟؟

المثال الخامس
ما يطلقون على انفسهم الاخوان المسلمين
برده بصرف النظر عن توجهاتهم و افعالهم فأنت اول ما تسمع الاسم على طول ما تقدرش تتكلم و لا تعلق عليه و لا تغلط فيهم
ليه؟؟
دول اخوان..!!
و كمان مسلمين..!!
دول ذُكرو فى القرآن هما كمان زى حزب الله..؟؟!!
ايه؟؟؟ تقدر تتكلم؟؟!!

المثال السادس
ما يطلقون عليه فرح اسلامى
و تروح تلاقيه فى مسجد و و بعد المغرب و فيه درس لأحد العلماء الاجلاء.. و حتى و ان مكانش فيه وليمه..! و بصرف النظر الراجل العالم الجليل دا قال ايه.
بس دا فرح اسلامى و فى الجامع و ايه؟؟ ايه؟؟
تقدر تتكلم؟؟!!

و من الامثلة كمان
السلفيين
من يتبعون اعمال و منهج السلف الصالح و بصرف النظر عن طريقة اتباعهم ليها
فهم سلفيين
و يتبعون السلف الصالح
الصــــــــــــــــــــــــــــــالح...!! هه؟؟
ايه؟؟ تقدر تتكلم؟؟


امثله كتير جدا جدا
توضع ايه الى انا اقصده من الظاهرة دى
مش عارف اعتقد ان من اسبابها السطحية و الاخذ بالظاهر (ظاهر الكلام)
و عدم التعقل و التدبر
مش عارف!!
و ممكن يكون من اسبابها لأحياج الناس لردود افعال لأفعال كتير مش مظبوطة فى حياتها
فوجدت فى الحاجات دى متنفس ليها
مش عارف..

كل ما ذكرته ليكو من امثله ممكن يكون اصحابها على حق فى افعالهم و نواياهم
الله اعلم..
لكن برده ممكن يكون وراء ايه مجموعة او مسمى من المسميات دى اغراض و اهداف منعرفهاش..
و الله اعلم..

معلش ملاحظة تانية
و هى ان الظاهرة دى موجودة فى نواحى كتير تانية فى حياتنا غير الناحية الدينية
و ان كانت بارزة اكثر فى الجانب الدينى
فهى مثلا موجودة فى السياسة
فمثلا من يقولون على انفسهم
كفاية
فهم يقولون كفاية للظلم و الاستبداد و الفساد
صح
تقدر تقول حاجة كلام صح مية فى المية
بس هما مين بقا؟؟ و بيعملو ايه؟؟ و هدفهم ايه؟؟ و نيتهم ايه؟؟
متعرفش
او مش لازم تعرف
بس دول بيقولو كفاية للظلم و الاستبداد و الفساد..
ايه؟؟
صح ولا لأ؟؟
و كمان هو فيه فساد ولا لأ؟؟
طبعاً فيه فساد..
و فيه سرقة كمان..
هو حد عاد لاقى ياكل
دى حكومة بنت كلب
ايه؟؟
صح ولا لأ؟؟


و كتير و كتير
انا هنا برده مبشككش فى حد و لا فى نوايا حد
انا بقول ملحوظات
و بقول ان فيه ناس بتستغل و بتستخدم الدين كرادع و كسلاح
و الله اعلم بنواياهم
خير؟؟
شر؟؟
الله اعلم
نحسبهم عند الله جميعاً من الاخيار ان شاء الله..
و ان لم يكونو
فربنا يهديهم...

و السؤال دلوقتى احنا فين من اناس دول كلهم؟؟
او حتى المفروض نكون فين؟؟

ختان الاناث

و من خبرتى كطبيب و من احتكاكى فى فترة تدريبى فى قسم النساء و التوليد بالقصر العينى مع النواب و الاطباء الزملاء و حتى كمان مع المريضات
(و مش من دراستى لعلم وظائف الاعضاء لأننا مخادناش حاجة من دى في الفيسيولوجى و لا فى اى مادة فى الكلية) اقول

اغلب الناس اجمعو على الكلام دا
الى هو الختان الى من الدرجة الاولى هو الصحيح و هو الذى استحبه الرسول عليه الصلاة و السلام

Type I, "clitoridotomy" (also called "hoodectomy" as a slang term), or sunna circumcision, after one of the Islamic

traditions, involves the removal or splitting of the clitoral hood.

لكن للأسف مفيش حد خالص شوفته معموله الطريقة دى
و كل الحالات الى شوفتها او زمايلى الاطباء المقيمين بقسم النساء و التوليد شافوها كانت من نوع الدرجة التانية و انت طالع
و للعلم فى كمان درجة رابعة

و دا للأسف هو الى بيأدى لحدوث المشاكل و المضاعفات
و الى ممكن توصل للوفاة زى ما حصل


و فضيلة المفتى قال
‏ وخلاصة القول ان هناك أربعة أنواع من الختان‏..‏ ثلاثة حرام باتفاق العلماء وهو مازال يمارس وواحدة أصبحت حراما بعد ان كانت عادة مباحة‏.

و برر كلامه بأنه قال
وعندما سألنا الأطباء هل مازلنا نحتاج إلي هذه العادة ؟ قالوا انها عادة ضارة ومن هنا جاء التحري

و انا شخصيا كطبيب اختلف مع رأى الاطباء دول و دا على حد معلوماتى و خبرتى
فانا ارى كما رأى الاخ المنقول عنه ان النوع الاول هو المستحب (من الناحية الطبية)
و لكنه للأسف لا يمارس نهائيا تقريبا فى مصر على حد خبرتى و على حد ما شوفت انا و زمايلى

و لكن
بم ان الاطباء دول -اللى فضيلة المفتى سألهم -اكيد مسلمين
و بم انهم اكيد اكبر منى و خبرتهم اكتر منى
فأنا احترم رأيهم و ارجح انه يكون هو الاصح طبعاً (لأنهم اساتذتى الى بتعلم منهم)

و بم ان فضيلة المفتى قال:
"فالنبي صلي الله عليه وسلم في الحديث الوارد بطريق ضعيف والذي ليس فيه حجة أو أمر شرعي نجده يقول لام عطية‏'‏ اشمي ولا تنهكي‏'‏ وكلمة اشمي ان تقوم بجرح خفيف فقط ثم يلتئم الجرح مع عدم إزالة أي جزء‏..‏هذا هو ما تكلم عنه الفقهاء من ناحية كونها عادة أم عبادة‏..‏ فذهب ابن الحاج في المدخل من علماء المالكية في القرن الثامن الهجري وذهب العظيم آبادي في سنن أبو داود بأنها عادة ولذلك تري أنها غير موجودة في المغرب العربي والسعودية وماليزيا‏..‏ بعضهم قال إنها عبادة أو شعيرة من الشعائر بسبب الحديث الضعيف‏..‏ والشعيرة هي‏'‏ اشمي‏'‏ ولو أنهكت يكون عدوانا يستوجب القصاص‏.‏ فالجرح من غير مبرر ليس من الشرع أو الطب‏.‏ لذلك لابد من الرجوع إلي الواقع"

بمعنى ان الموضوع فيه شك
او حتى كمان ممكن يكون عادة مش عبادة

و الراجل كمان فى فتوته حرم الختان بالطريقة الى بيتعمل بيها اليومين دول

و بم ان الناس دول كلهم اعلم منى

و بم ان المسألة مختلف عليها
و ليست من اساسيات الدين كالصلاة مثلاً

و بم ان الناس دى كلها هتسأل امام الله يوم القيامة على الفتاوى و الاحكام الى قالوها للناس

و بم ان ربنا هيسألنى يوم القيامة عن طاعة اولياء الامور (حتى ولو كانو مش و لا بد -و ورد فى كدا الاحاديث-) و اهل العلم (اهل الذكر) الى هما فى الحالة دى فضيلة المفتى و الاطباء الى سألهم

فأنا لا اعارض راى المفتى
و انا شخصيا لن اقوم بهذه العملية كطبيب
و لن اقوم بها لمن هم تحت ولاية امرى

الا لو حدث و غير المفتى رأيه (و دا بتغير الظروف او حتى لو اكتشف انه كان غلط و حب يصلح نفسه) او جاء مفتى آخر برأى آخر
و الخطأ طبعا شيء وارد جدا فى اى مهنه و مع اى ناس حتى مع اساتذة الجراحة الكبار فى غرف العمليات و فى اتخاذهم لقرارات العلاج

فالراجل اجتهد
و ان اصاب فله اجران
و ان اخطأ فله اجر اجتهاده

و اسمحولى اكرر تانى
أنا لا اعارض راى المفتى
و انا شخصيا لن اقوم بهذه العملية كطبيب
و لن اقوم بها لمن هم تحت ولاية امرى

و مش هقعد احسبن و قول المفتى دا خاين و لا بتاع الحكومة و لا اى كلام من دا
و لا هقعد اسمع كلام اى حد ينقل اى كلام الله اعلم هوا نقله منين و لا درجة صحتة ايه و لا هو فهمه ازاى
و لا اعرف حتى غرض الى نقل الكلام دا ايه؟؟؟

انا سيبت الامر لاولى الامر و اولى الخبرة (اهل الذكر)
و هما زى ما بقول للمرة المليون اعلم منى بهذا الامر

و الى شايف نفسه اعلم منهم و يعرف اكتر منهم او شايفهم.....
هو حر

زى بالظبط العيان الى بيجيلى و قوله رجلك دى محتاجة بتر
و دا احسن لك و لو مبترناش رجلك هتموت (و دا طبعا على حد علمى و رأيتى لظروف رجله و ظروف المستشفى الى بشتغل فيها)
طبعا رأيى يحتمل الخطأ....
و طبعاً العيان دا حر فى رجله
لو روح بيها من غير ما يسمع رأى اهل الخبرة يبقى بيحكم على نفسه بالموت
بالرغم انه طبعا ممكن ميموتش و يكون رأيى غلط

فأنا الحمد لله مش متضايق و لا آلمنى اى حاجة
لأنى اتعامل مع اى مشكلة من النوع دا بالاسلوب دا

اسمحولى اوضح نقطة تانية كمان
ان الختان لم يحرم
و لكن القرار الى صدر صدر بتجريم ممارسته او حتى كمان تحريمه
الا
بعد استشارة رئيس قسم النساء و فى مستشفى عام
و انا اعرف من زمان انهم بيعاملوه على انه حالة من حالات جراحة التجميل
و فى حالات بالفعل بتحتاج عمليات و اطباء التجميل بيعملوها

يعنى الموضوع من الآخر كان هدفه منع العك الى كان بيحصل و منع حالات الوفاه بسبب حاجة ملهاش سبب طبى موثوق فيه

و لو اتعملت بتتعمل غلط

و من هنا جاء التجريم على اساس ان كل الى كانو بيمارسو العادة دى جهلاء و مبيعملوهاش صح
لأنهم من الآخر متعلموهاش و لا حتى خادوها فى علم وظائف الاعضاء و لا حتى وزير الصحة كمان خادها فى الكلية و لا حد علمها له